يروب اللى مقدارى قوى هيكل و توانا كمسه‌لر تعيين اولنوب نوبت ايله محفه‌يى كتوررلر و كندويه قوشلان عسكرك بعضى التون يالدزلى و بعضى كموش قايلى كورزلرى اللرنده طوتوب داراتله اهسته اهسته يوررلر و بعضيلر شير نريمان كبى عمل زراندور و سيم اندور و قلجلرى عريان ايدوب او موزلرى برابرنده طوته رق و كميلرى رنكارنك سنجاقلر و سنجاقلر اوجنه انواع الوانله ملون فانوسلر صاغنده و صولنده كيدرلر اكر يولده كيجه ايريشورسه فانوسلرى ياقوب نورنده يوررلر بونلردن غرض مقصود همان عرض تجملدر يوخسه منزل كيجيه قالمق محالدر بو حشمت و ابهت ايله محفه‌يى منزل به منزل ارقه لرنده كتوررلر و صندوق و سائر رحت و اسبابلرينى دخى ايكيشر كمسه چوب اوزرينه اصوب اومور لرنده قالدره رق موى اليهك او كنجه يوررلر بو عظمت و شوكتله هر منزله كه اينرلر اول اميرك مرتبه و مقداريجه پادشاه جانبندن ديوانخانه‌لر اولمغله نزول ايتدكده خوابكاهى ايچون بر تخت و اكاكوره جامه خوابى ملون اطلسدن و تختك اوكنده منقش حرير لردن پرده‌لر اصيلوب و سراينك طشره سنده انواع تزيين ايله بر نيم تخت اولوب كندونك جميع اسباب عيش و عشرتى و خدم و حشنك دخى كليا لوازمى انده حاضر اولوب و اول شهرده اولان اكابر و اعيان مراتب و مناصلرى اوزره مومى اليهك پادشاه جانبندن كلديكى جهتدن اكاتبريكه كلوب تعظيم و اكرام و توقير و احترام ايله رسم خوش امدى اجرا ايدرلر و بعد زمان اول ولايتدن منصب اخر و يا عزل ايله كيدر ايسه ده ينه بهرحال تعظيمنى واجب بيلوب اكابر و محافظ مملكت بزقاج منزل برابر كيدرك اندن وداع ايدوب كير و عودت ايدر و متولى اولان امير كبير هر منزله كلدكده اوكنده اولان منازله نه منصب ايچون كلديكنى اعلام ايدر و اول قوم دخى انك حدنه كوره تعظيم و تكريم ايدر اول شخص دخى تجملى وداراتى ايله منزل به منزل كيدرك خانبالغكه دار السلطنهء خطايدر بر فرسخ قالدقده اول شوكت و حشمتى كيدروب جميع اسباب و رختنى كرا ايله عربه‌لره يوكلده‌رك كندو دخى اجرت ايله برات با خود بر قاتره سوار اولوب اظهار ذلت ايله شهره داخل اولور زيرا قانونلرنده شويله دركه هر نقدر سردار معظم و سپهدار محترم اولسه ده خانبالغه كيردكده تعظيما يكسواره اولورلر و اول خادملركه خاقاندن بر امره مأمور اولوب سرايدن چقسه‌لر انلرك يامالى بر كون اول چقار و پاى ديدكلرى انواع نقوش ايله مزين بر لوحدر كه مأمور اولان كمسه نك مأموريتى انك اوزرينه يازيلور و مذكور پايلردن قچانكه بر دانه سى ديوانخانهء خاقاندن چقسه اهالى شهر جمله خبردار اولوب هركس اولكون سك خوك و مرغلرين خانه‌لرينه